जाजरकोट जिल्ला अस्पताललाई USG मेसिन हस्तान्तरण

जाजरकोट । जिल्ला अस्पताल जाजरकोटमा विगत दुई महिनादेखि अवरुद्ध हुँदै आएको अल्ट्रासोनोग्राफी (USG) सेवा सञ्चालनमा सहजता ल्याउने उद्देश्यले अस्पताललाई नयाँ USG मेसिन हस्तान्तरण गरिएको छ। गर्भवती महिलाको नियमित गर्भ जाँच (ANC) लगायत USG आवश्यक पर्ने अन्य स्वास्थ्य सेवामा सहजता ल्याउने उद्देश्यले उक्त मेसिन अस्पताललाई औपचारिक रूपमा हस्तान्तरण गरिएको हो।
जिल्ला अस्पताल जाजरकोटमा USG मेसिन उपलब्ध नहुँदा विशेषगरी गर्भवती महिलाको ANC जाँच तथा अन्य USG सम्बन्धी सेवामा समस्या उत्पन्न भएको थियो। सेवा लिन आउने गर्भवती महिला तथा अन्य बिरामीलाई USG जाँचका लागि अन्य स्वास्थ्य संस्थामा रेफर गर्नुपर्ने अवस्था रहेको थियो।
अस्पतालले USG मेसिनको आवश्यकतालाई मध्यनजर गर्दै Save the Children समक्ष सहयोगका लागि अनुरोध गरेको थियो। Save the Children को Action Adolescent Maternal and Newborn Health (aMNH) Project अन्तर्गत साझेदार संस्थाका रूपमा कार्यरत Hilly Region Development Campaign (HRDC), जाजरकोट ले अस्पतालको आवश्यकता अनुसार USG मेसिन खरिदका लागि पहल गरेको थियो।
सोही पहलअन्तर्गत खरिद गरिएको USG मेसिन एक कार्यक्रमका बीच जिल्ला अस्पताल जाजरकोटलाई औपचारिक रूपमा हस्तान्तरण गरिएको हो। उक्त USG मेसिनको कुल लागत रु. १० लाख १५ हजार ८७० (भ्याटसहित) रहेको छ।
सेवा प्रभावित भएको अस्पतालको भनाइ

हस्तान्तरण कार्यक्रममा बोल्दै जिल्ला अस्पताल जाजरकोटका निमित्त कार्यालय प्रमुख डाक्टर सुनिल पुनले USG मेसिन उपलब्ध नहुँदा अस्पतालको मातृ स्वास्थ्य सेवामा प्रत्यक्ष असर परेको बताउनुभयो।

उहाँका अनुसार विशेषगरी गर्भवती महिलाको ANC जाँचका क्रममा आवश्यक पर्ने USG सेवा उपलब्ध हुन नसक्दा बिरामीलाई अन्य स्वास्थ्य संस्थामा रेफर गर्नुपर्ने बाध्यता थियो।
उहाँले भन्नुभयो, “USG मेसिन नहुँदा गर्भवती महिलाको ANC लगायतका सेवामा समस्या भएको थियो। USG का लागि अन्य स्वास्थ्य संस्थामा रेफर गर्नुपर्ने अवस्था हुँदा अस्पताल र सेवाग्राही दुवैलाई असहज भएको थियो।”
अस्पतालले Save the Children समक्ष सहयोगका लागि अनुरोध गरेपछि HRDC, जाजरकोटले तत्काल आवश्यक प्रक्रिया अघि बढाई मेसिन खरिद गरी छिटोभन्दा छिटो सेवा सञ्चालन गर्न सहयोग गरेको भन्दै उहाँले Save the Children र HRDC प्रति आभार व्यक्त गर्नुभयो। उहाँले प्राप्त सहयोगले जिल्लाको मातृ तथा नवजात शिशु स्वास्थ्य सेवाको क्षेत्रमा महत्वपूर्ण योगदान पुर्‍याउने विश्वास व्यक्त गर्नुभयो।

गुणस्तरीय स्वास्थ्य सेवामा पहुँचमा जोड
कार्यक्रममा बोल्दै Save the Children की वरिष्ठ प्राविधिक संयोजक ज्योति कार्कीले aMNH परियोजनाले मातृ तथा नवजात शिशुको स्वास्थ्य सेवामा गुणस्तरीय र सहज पहुँच सुनिश्चित गर्न प्रतिबद्ध रहेको बताउनुभयो।
उहाँले स्वास्थ्य सेवा पालिकाको सीमाभित्र मात्र सीमित नरही आवश्यकताअनुसार सबै सेवाग्राहीसम्म सहज रूपमा पुग्नुपर्नेमा जोड दिनुभयो। साथै, जिल्ला अस्पताललाई उपलब्ध गराइएको USG मेसिनको उचित प्रयोग, सुरक्षित सञ्चालन तथा प्रभावकारी व्यवस्थापनमा ध्यान दिन आग्रह गर्नुभयो।
नयाँ मेसिनको उचित उपयोगबाट गर्भवती महिला तथा अन्य सेवाग्राहीले समयमै आवश्यक USG सेवा प्राप्त गर्ने विश्वास उहाँले व्यक्त गर्नुभयो।
स्वास्थ्य सुधारमा HRDC को निरन्तर पहल
त्यसैगरी, HRDC, जाजरकोटका अध्यक्षले संस्थाले लामो समयदेखि जाजरकोटमा विभिन्न परियोजना तथा कार्यक्रममार्फत स्वास्थ्य अवस्था सुधारका लागि काम गर्दै आएको बताउनुभयो।
जिल्ला अस्पताल जाजरकोटको आवश्यकता र सेवाग्राहीको समस्यालाई मध्यनजर गर्दै USG मेसिन उपलब्ध गराइएको उहाँले जानकारी दिनुभयो। USG मेसिनको अभावका कारण अस्पतालमा आउने कुनै पनि गर्भवती महिला ANC लगायत आवश्यक स्वास्थ्य सेवाबाट वञ्चित हुन नपरोस् भन्ने उद्देश्यले सहयोग गरिएको उहाँको भनाइ थियो।
उहाँले उपलब्ध गराइएको उपकरणको उचित प्रयोग र संरक्षण गर्दै समुदायलाई प्रभावकारी तथा निरन्तर सेवा प्रदान गर्न अस्पताललाई आग्रह गर्नुभयो।
भ्रूणको वृद्धि निगरानीदेखि जटिलता पहिचानसम्म
Action Adolescent Maternal and Newborn Health (aMNH) Project को मुख्य उद्देश्य गर्भवती तथा अभिभावक किशोरीहरूमा गुणस्तरीय, सम्मानजनक गर्भावस्था, प्रसव तथा प्रसवपूर्व सेवाका साथै नवजात शिशु सेवाको पहुँच बढाउनु रहेको छ।
परियोजनाअन्तर्गत उपलब्ध गराइएको USG मेसिनबाट भ्रूणको वृद्धि निगरानी, स्वस्थ गर्भावस्था पुष्टि गर्न सहयोग, सम्भावित जटिलताको प्रारम्भिक पहिचान, गर्भावस्था पुष्टि तथा गर्भावस्थाको अवधि निर्धारण र भ्रूणको वृद्धि तथा सम्भावित असामान्यताको परीक्षण गर्न सहयोग पुग्ने जनाइएको छ।
परियोजनाको कार्यान्वयन साझेदार HRDC, जाजरकोट रहेको छ भने यसको कार्यक्षेत्र भेरी नगरपालिका र शिवालय गाउँपालिका रहेको छ। परियोजनाको दाता Save the Children रहेको छ।
नयाँ USG मेसिन प्राप्त भएसँगै जिल्ला अस्पताल जाजरकोटमा गर्भवती महिलाको ANC जाँच तथा USG आवश्यक पर्ने अन्य स्वास्थ्य सेवाहरू पुनः सहज रूपमा सञ्चालन हुने अपेक्षा गरिएको छ। यसबाट जिल्लाका गर्भवती महिला तथा अन्य सेवाग्राहीलाई USG सेवाका लागि अन्य स्वास्थ्य संस्थामा जानुपर्ने बाध्यता कम हुनुका साथै मातृ तथा नवजात शिशु स्वास्थ्य सेवाको पहुँच र गुणस्तरमा थप सुधार हुने विश्वास गरिएको छ।